Konferénsia Imprensa Kondisaun Atual Bee Moos Periódu Marsu 2022 - Outubru 2023

Bee moos, saneamentu no Ijene nu’udar direitu umanus ne’ebé labele haketak ho ema nia moris. Investe iha bee moos no saneamentu nu’udar meius ida atu melõria di’ak liu tan iha setór saúde, agrikultura, edukasaun, meiu-ambiente hodi haburas kresimentu ekonomiku, moris di’ak sidadaun sira nian inklui hadia oportunidade ba empregu no produtividade nasaun nian. Estadu liu husi Governu esforsu oi-oin atu hakonu direitu fundamnetu ida ne’e. Biar nune’e asuntu bee moos sei kontinua problematiku tanba komunidade balu kontinua la asesu bee ho di’ak.

Rezultadu deskobrementu HAK, ba kondisaun asesu bee  komunidade iha Munusípiu 6 (Baucau, Viqueque, Aileu, Ainaro, Dili & Ermera), ho totál Suku 56, aldeia 338, total populasaun Rihun Atus tolu Ualu, Atus Rua Sanulu Resin Tolu (308,213) no mós total uma kain Rihun neennulu Resin Neen, Atus Tolu Neen nulu Resin Tolu (66,363). “Klasifika:

1. Uma kain ne’ebé asesu kanalizasaun totál rihun haat nulu resin neen, atus rua sanulu (46,210) ka 69,63 %
2. Uma kain ne’ebé asesu bee matan totál rihun sia, atus ualu haat nulu resin sia (9,849) ka 14, 84 % 
3. Uma kain ne’ebé asesu bee posu totál rihun sanulu, atus tolu haat (10,304) ka 15, 53 %.

HAK ho Parseiru realiza Auditoria sosial liu husi mekanismu diskusaun Kartaun Pontuasaun Komunidade-KPK iha Sistema bee rurais 41, iha Munisipiu (Manufahi 21 Liquiça 20). Husi rezultadu auditoria sosial hatudu katak sistema bee sira ne’ebe mak harii ona tinan rua ba leten hasoru desafiu iha ninia operasaun no manutesaun tanba barak mak aat no la funsiona. Husi sitema bee 41 ne’ebe mak HAK hala’o auditoria sosial hatudu katak  76 % mak estrutura GMF la funsiona. Estrutura GMF la funsiona kontribui ba sistema bee la funsiona ho efetivu.

HAK nia observasaun jeral, Kondisaun komunidade nian asesu ba bee matan no bee posu kontinua akontese tanba investimentu Orsamentu Jeral Estadu-OJE ba asuntu infraestrtura bazika seidauk adekuadu, asuntu mudansa klimatika. Mudansa klimatika rekursu natureza ne’ebé afetadu liu mak bee tanba iha tempu bai loro rekursu bee matan menus, halo bee maran no iha tempu udan akontese inundasaun estragus ba bee matan protejidu sira, ida ne’e fo impaktu komundiade sira la asesu bee ho kualidade no di’ak, liu-liu  labarik no feto sira. Sita sira nia tempu barak liu ba kuru bee no sira lakon servisu produtivu sira ne’ebe loloos tenki halo. Kondisaun seluk kresimentu populasaun ne’ebe kontinua aumenta ezije liu tan demanda ema nian asesu ba bee. La iha sistema informasaun bee saneamentu no ijiene-BESI ne’ebé  bele kontribui ba entidade estadu sira atu elabora planeamentu ne’ebe korespende ba kondisaun komunidade sira nian asesu bee tantu iha area rurais no mos area urbana. GMF servisu ho voluntariamente, komunidade sira seidauk senti sai nain ba sistema bee sira ne’ebe mak Estadu liu husi Governu, Parseiru Dezenvolvimentu sira harii Kondisaun seluk mós komunidade barak mak hela iha knua antigu/foho leten ne’e susar atu kanaliza sistema bee ba sira.

HAK fiar tebes, Komitmentu programa IX Governu nian ne’ebé investe ba Bee moos no Saneamentu báziku labele adia tan. Hein katak durante periodu tinan lima, Governu iha pleaneamentu ba investimentu ida ne’ebe adekuadu, kria mekanismu koordenasaun ho instituisaun sira seluk ne’ebe efetivu hodi dezenvolve no kontribui ba mudansa ne’ebe boot asesu komunidade nian ba bee moos ida seguru, sustentavel no inkluzivu.

• Rekomendasaun

1. Husu ba Governu atu investe ba asuntu bee, Saneamentu no Ijiene-BESI liu husi Orsamentu Jerál Estadu-OJE tenke liu 3 % hodi materializa Progama IX Governu nian katak “asuntu bee no saneamentu labele adia tan”
2. Husu ba Parlamentu Nasionál Komisaun E atu apoiu Ministériu Obras Publika ho Ministériu relevantes sira seluk hodi diskute investimentu Orsamentu Jerál Estadu ne’ebé naton ba asuntu BESI ba tinan 2024
3. Husu ba Parlamentu Nasionál Komisaun E ne’ebé trata asuntu Infraestrutura atu optimaliza liu tan servisu fiskalizasaun ba kondisaun asesu bee komunidade nian iha area urbana no area rural
4. Husu ba Governu atu halo investimentu ida ne’ebe integradu no sustentabel ba politika jestaun rekursu bee
5. Husu ba Governu atu halo alterasaun ba dekreitu lei numeru: 04/2004 atu prioritiza ba investimentu, melloramentu no asegura sustentabilidade sistema bee rurais liu husi fo insentivu ba Grupu Maneja Fasilidade-GMF
6. Husu ba Governu atu hametin mekanismu koordenasaun ida ne’ebe efetivu no integradu entre Instituisaun Estadu interligadu sira ba investimentu setor bee no asegura nia sustentabildiade
7. Husu ba Governu atu kria sistema informasaun ida ne’ebe adekuadu no uniforme hodi apoiu iha planeamentu integradu ba bee saneamentu no ijiene-BESI
8. Husu ba Governu atu asegura kualidade bee moos liu husi teste laboratorium hodi hatene kualidade bee tantu iha area urbana no area rural
9. Husu ba Governu atu halo Edukasaun sivika hodi konsiensializa komunidade sira relasiona direitu no devér nu’udar sidadaun síviku.